آلیشار سونمز

گونش سونمز داغ اگیلمز ائل اوچون اولن اولمز

فلکین قانلی الیندن بیر آتیلمیش یئره اَندی

بیر فلاکت آنانین جان شیرسیندن سوتون اَمدی

بو للو نیسگیل شله  سین چیگنینه آلدی

تای توشوندان دالی قالدی

ساری گول میثلی سارالدی

گونی تک باغری قارالدی

درد الیندن زارا گلدی

گونی گوندن قارا گلدی

خان چوپانسیز سِلَه تاپشیرسین اوزون ،

یوردوموزا بیر سارا گلدی

بیر وفاسیز یار اَلیندن ،

یارا گلمز سانا گلدی

بیر یازیق قیز جان اَلیندن جانا گلمز جانا گلدی

گئجه چکده الموت دامنه سیندن بورایا درمانا گلدی

بیر آدامسیز سوری آدلی

اَلی باغلی ، دیلی باغلی

سوری کیمدی؟

سوری بیر گولدی ، جهنمده بیتیبدی

سوری بیر دامجدی ، گؤزدن آخاراخ اُوزده ایتیبدیر

سوری یول یولچوسوده ایره یوخ دوزده ایتیبدیر

سوری بیر مرثیه دی اُخشویاراخ سوزده ایتیبدیر

او کونول لرده که ایتمیشدی اَزلدن ، اُودو گؤزدن ده ایتیبدیر

سوری بیر گؤزلری باغلی ، اوزو داغلی ، سؤزی داغلی

اُولوب هاردان هارا باغلی

بُوشلویوب دوغما دیارین ، اُوموب البته یاریندان

اَل اوزوب هر نه واریندان

قؤرخمایب شهریمیزین قیشدا آمانسیز بؤراننان نه قاریندان

گزیر آواره تاپا یاندریجی دردینه چاره ، تاپابیلمیر

چؤخ سویر عشقی باشیندان آتا اما آتا بیلمیر

اُوا باخ اُوچو دالیجا قاچیر اما چاتا بیلمیر

ایشه باخ لیلی دوشوب چؤللره مجنون سراغیندا

شیرین الده تِشه ، داغ پارچالیور فرهاد اوتورموش اتاقیندا

تشنه لب قوم نئجه گور جان وئریر دریا قیراغیندا

گؤزده حسرت یئرینی خوشلیوب ، ابهام دوداغیندا

وارلیغین سؤن اثری آز قالیر ایتسین یاناغیندا

سانکی بیر کؤزودو بورونموش کوله کورلوخ اوجاقیندا

کؤزلنن پیلته کیمین یاغ تؤکنییدی چراغیندا

بوی آتیر رنج باغیندا ، قؤجالیر گنچ چاغیندا

بیر آدامسیز ، سوری آدلی

اَلی باغلی ، دیلی باغلی

سوری جان اُمما ، فلکین یوخدی وفاسی

نَقَدَر یوخدی وفاسی او قدر چوخدی جفاسی

کهنه رقاصه کیمین هر کسنه بیر جوردی اداسی

اُو ایاقدان توشی ایستر ایاقدان سالان اولسون

او تالانمیشلاری ایستر گونی گوندن تالان اولسون

او آتیلمیشلاری ایستر هامیدان چوخ آتان اولسون

او ساتیلمیشلاری ایستر قول ائدر کن ساتان اولسون

 

نیله مک قورقو بوجوردو فلکین نظمی ازلدن

اولوب اضدادینه باغلی

قره سیز ، آقلار اولانماز

دره سیز ، داغلار اولانماز

اولوسوز ، ساغلار اولانماز

گرک هر بیر گوزه له ، بیر دانا چرکین ده یارانسین

بیره انسین یئره گؤیدن ، بیریده عرشه اوجالسین

بیری چالسین ال ایاق غم دنیزینده

بیری ساحیلده سو ینجیله دایانسین

بیری ذلت پالاسین باشه چکیب یاتسادا

آنجاق بیری نین بختی اویانسین

بیری قویلانسادا نعمت لره

بیری ده قانه بویانسین

بیره آدامسیز ، سوری آدلی

ساچلاریندان دارا باغلی

نیله مک ایش بئله گلمیش ، چُور گلنده گوله گلمیش

کمانین ایگری کمانیندا اولان اوخ آتیلاندا دوزه دئگمیش

دیلسیزین باغرینی دلمیش ایگری قالمیش دوزی ائگمیش

اونا خوشدور بو فلک ائل ساراسین سئللر آپارسین

بلبل حسرت چکرک گول ثمرین یللر آپارسین

قیسی چوللر قویوب لیلی نی محمللر آپارسین

خسروی شیرین ایله ال اله دیرسین

فرهادین قامتین ایگسین

باخاراخ چرخ زمان نشئیه گلسین ، کفه دولسون

سوری لار سولسادا سولسون

بیری باش یولسادا ، یولسون

سیسقا بیر اولدوز اگر اولماسا اولدوزلار ایچینده ، بوسما ظلمته باتماز

داش آتان ، کول باشی قویموش ، داشنی اوزگیه آتماز

سن یتیشسن هدفه ، اوندا فلک ، مقصده چاتماز

داخی افسانه یارانماز

سوری آی باشی بلالی ، زمانین قافلی غزالی

سوری بیر قوشدو خزان آیری سالیبدور یوواسیندان

اَل اوزوبدور آتاسیندان

جوجه دور حیف اولا سوت گورمیوب اصلان آناسیندان

درد وئرن درده سایب ، اما خبر یوخ داواسیندان

آغلیب صدقیاراخ بهره آپارمیر دعاسیندان

بونا قانعدی تنفس ایلیور یار هاواسیندان

او بیر آئینه ده رسام چکیب اوستونه زنگار

اوندا یوخ قدرت گفتار

گِنچ وقتینده ، دل آزار

گؤره سن کیمده خطاکار

گؤره سن کیمده خطاکار

+ نوشته شده در  چهارشنبه 22 فروردین1386ساعت 4:25  توسط وحید  |